ബൂലോകത്തുനിന്നൊരു ശേഷം ചിന്ത്യം!

സൌഹൃദം വെബ്ബ് ടീം അണിയിച്ചൊരുക്കുന്ന ബൂലോകത്തെ ആദ്യത്തെ മൂവീ ഫിലിം.
ത്രീ ഡോട്ട്സ് പ്രൊഡക്ഷൻസിന്റെ ബാനറിൽ നവാസ് തിരുവനന്തപുരം നിർമ്മിച്ച്‌ സുനിൽ പണിക്കർ സംവിധാനം ചെയ്യുന്ന ‘ശേഷം ചിന്ത്യം’ എന്ന
സിനിമയുടെ പൂജ ഈ മാസം ഇരുപതാം തീയതി തിരുവനന്തപുരത്തു നടക്കും.
ഏപ്രിൽ രണ്ടിന് കോട്ടയത്തെ പാലായിൽ ഒറ്റ ഷെഡ്യൂളിൽ സിനിമയുടെ
ചിത്രീകരണം ആരംഭിക്കും. പ്രശസ്ത ബ്ലോഗർ ഹരി പാലയാണ് (പോങ്ങുമ്മൂടൻ) കഥയും, തിരക്കഥയും, സംഭാഷണവും നിർവ്വഹിക്കുന്നത്‌. ബിജുമേനോൻ, സിദ്ധിഖ്, ഡോ. ബിജു എബ്രഹാം, സംവൃതാ സുനിൽ,  ജഗതി, സുരാജ് വെഞ്ഞാറമ്മൂട്‌, ബിജുക്കുട്ടൻ, ബാലചന്ദ്രൻ ചുള്ളിക്കാട്‌, ബിന്ദു പണിക്കർ, പ്രീതികാ സുരേഷ് തുടങ്ങിയവർ അഭിനയിക്കുന്നു. ഛായാഗ്രഹണം സന്തോഷ് മേലത്തുമേലെ. യേശുദാസ്, ചിത്ര, ശ്വേതാമോഹൻ, മുരുകൻ കാട്ടാക്കട, അനിൽ ഭാസ്കർ എന്നിവർ ആലപിക്കുന്ന ഗാനങ്ങൾക്ക്‌ ഈണം നൽകുന്നത്‌ ഗായകൻ പത്മശ്രീ കെ. പി. ഉദയഭാനുവും, ബോംബെ രവിയുമാണ്. കവിതയും, ഗാനരചനയും സുനിൽ പണിക്കർ നിർവ്വഹിക്കുന്നു. സൌഹൃദം കൂട്ടായ്മയിലെ സജീവ പ്രവർത്തകരായ കെ. സി. ജോഷി, അഖിൽ, അനിൽ കുരിയാത്തി തുടങ്ങിയവരാണ് അണിയറയിൽ.

പ്രതികാരം ജീവിതത്തെ ഒരിക്കലും വിശുദ്ധീകരിക്കുന്നില്ല. നന്മ കൊണ്ടാവണം മധുരമായ പകവീട്ടലുകൾ പൂർണ്ണമാകേണ്ടത്. ഓരോ നന്മയും ഓരോ ശരികളാണ്. കാലാതീതമായ ഒരു മുറിവുപോലെ ആ നന്മ പ്രതിയോഗിയെ കീഴ്പ്പെടുത്തുക തന്നെ ചെയ്യും. ഈ സിനിമ അത്തരമൊരു നന്മയുടെ ഓർമ്മപ്പെടുത്തലാണ്. സൈബർ കുറ്റകൃത്യങ്ങൾ പെരുകുന്ന പുതിയകാലത്തിൽ സമൂഹത്തിന് നൽകുന്ന ഒരു മെസ്സേജായിരിക്കും ശേഷം ചിന്ത്യം.